Կես միլիոն հույն է սպանվել

Մայիսի 19-ը Օսմանյան Թուրքիայում պոնտոսցի հույների ցեղասպանության օրն է:

Օսմանյան Թուրքիայում հույների հանդեպ բռնությունների առաջին ալիքը թափ առավ Առաջին համաշխարհային պատերազմի սկսվելուն պես` հայերի և ասորիների ցեղասպանության հետ միաժամանակ:

1916թ-ին սկսվեց հույների զանգվածային բռնագաղթն ու սպանությունները: Թուրքական իշխանությունները չէին էլ թաքցնում, որ հույների բնաջնջումը Հայոց ցեղասպանության նույն սցենարով է ընթանում:

1919-1922թթ.-ների ընթացքում` հունա-թուրքական պատերազմի ժամանակ, պոնտոսցի հույների ցեղասպանությունն իրականացվում էր արդեն Թուրքական Հանրապետության կառավարության կողմից:

1922թ-ի սեպտեմբերին Մուստաֆա Քեմալ Աթաթուրքը թալանի մատնեց Սմիրնա (Իզմիր) քաղաքը, որտեղ սրի էին մատնվել մոտ հարյուր հազար հայեր և հույներ: Հետևելով հրի մատնված Իզմիր քաղաքին` Քեմալ Աթաթուրքը հայտարարեց. «Մեր առջև հիմա ապացույցն է առ այն, որ Թուրքիան մաքրվել է դավաճաններից ու այլազգիներից: Այսուհետ, Թուրքիան պատկանում է թուրքերին»:

Տարբեր տվյալներով` Թուրքիայում 500 հազարից ավելի պոնտոսցի հույներ են ոչնչացվել: Նրանք, ում հաջողվել է ողջ մնալ զրկվել են հայրենիքից ու դարձել վտարանդի:

Հիշեցնենք, որ 2010թ-ի մարտի 11-ին Շվեդիայի խորհրդարանն ընդունել է Օսմանյան Թուրքիայում իրականացված հայերի, հույների և ասորիների ցեղասպանության բանաձևը: Այսպիսով` Շվեդիան դարձավ առաջին երկիրը, որ ճանաչեց պոնտոսցի հույների ցեղասպանությունը:

a1plus.am