August 9, 2020

Կանանց միջազգային օրը նշվեց հավասարություն պահանջող երթերով

Կանանց միջազգային օրը աշխարհի շատ երկրներում նշվել է բողոքի ցույցերով: Մասնակիցները դեմ են արտահայտվել կանանց իրավունքների անհավասարությանն ու նրանց նկատմամբ բռնություններին: Կորոնավիրուսի համաճարակը չի խանգարել, որ ցույցերը մարդաշատ լինեն:

Եվրոպայում՝ Իսպանիայում, Պորտուգալիայում, Լեհաստանում, Գերմանիայում, Ֆրանսիայում, ցույցերը կազմակերպել էին ֆեմինիստներն ու պահանջել հավասար իրավունքներ, կանանց նկատմամբ բռնությունների դադարեցում: Բրիտանիայում, կորոնավիրուսի պատճառով, բազմաթիվ բողոքի ակցիաներ անցկացվել են վիրտուալ ռեժիմով: Բեռլինում հարյուրավոր կանայք որպես բողոքի նշան հեծանիվներ են վարել մայրաքաղաքի կենտրոնում:

Փարիզում երթը տեղի է ունեցել՝ չնայած հորդառատ անձրևին: Ցուցարարները հանդես են եկել սեռական բռնության և ոտնձգությունների դեմ ուղղված կարգախոսներով, պահանջել տղամարդկանց և կանանց հավասար վարձատրություն: Նախորդ օրը Ֆրանսիայի մայրաքաղաքում կանանց իրավունքների հարցով ցույցն ավարտվել էր ոստիկանության հետ բախումներով, ձերբակալվել էր 9 մասնակից: Փարիզի քաղաքապետը դատապարտել է իրավապահների գործողությունները:

Իրենց իրավունքների պաշտպանության համար պայքարում են նաև մուսուլման կանայք

Կանանց իրավունքների համար պայքարն այսօր ընդգրկել է նաև մահմեդական աշխարհը: Մուսուլման կանայք նույնպես ցանկանում են տղամարդկանց հետ հավասար իրավունքներ ունենալ, պահանջում են վերացնել խտրական աշխատանքային օրենքները, կանանց նկատմամբ բռնությունները: Սակայն մուսուլման տղամարդիկ հիմնականում դեմ են կանանց իրավահավասարության պահանջներին:

Բաքվի կենտրոնում մեկնարկած ակցիայի հիմնական կարգախոսն էր՝ «Մի՛  հանդուրժիր բռնությունը»: Հանրահավաքի առաջին րոպեներից ոստիկանները փորձել են խանգարել երթը, փակել են մասնակիցների ճանապարհը, նրանց ձեռքերից խլել պաստառները: Քաղաքացիական հագուստով իրավապահները նրանց նկատմամբ գործադրել են ֆիզիկական ճնշում, մի քանի ցուցարար ձերբակալվել է:

Իսլամաբադում պահպանողական պակիստանցիները չեն աջակցել կին ակտիվիստների ցույցերին և երթի մասնակիցների վրա քարեր ու փայտեր են նետել: Մի քանի մարդ վիրավորվել է, ցուցարարները ստիպված են եղել թաքնվել և սպասել իրավապահ մարմինների ժամանմանը:

Ղրղըզստանի մայրաքաղաք Բիշքեկում կանանց երթն անցել է նրանց նկատմամբ բռնություններով: Համերաշխության երթի մասնակիցների վրա են հարձակվել դիմակավորված տղամարդիկ, իսկ ոստիկանությունը հարձակվողների փոխարեն ձերբակալել է 70 կին ակտիվիստի:

Բռնություն է կիրառվել նաև Ստամբուլում անցկացված հավաքի մասնակիցների նկատմամբ: Իրավապահները արցունքաբեր գազ են կիրառել քաղաքի կենտրոնական Թաքսիմ հրապարակում հավաքված ակտիվիստների դեմ, որոնք մասնակցում էին կանանց իրավունքների պաշտպանության երթին: Չնայած Քաղաքային իշխանությունները փակել էին Թաքսիմ հրապարակ տանող բոլոր փողոցները, ինչպես նաև մետրոյի մի քանի կայարան Ստամբուլի կենտրոնում, հարյուրավոր կանայք, այնուամենայնիվ, մասնակցել են ակցիային:

Հեղինակ`Մարիամ Մխիթարյան

1lurer.am

Be the first to comment

Leave a Reply

Your email address will not be published.


*


4/AAB0Q2qi2hC5WMFScWsapOW0d1ypdvjHSDFgUciTQjW7ImoDTCNLGO4