November 18, 2019

«Ինքնասպանություն գործած քաղաքական ուժը ինչպե՞ս է կոնսոլիդացվելու»․ Փաշինյանը ՀՀԿ-ի մասին

«Ինքնասպանություն գործած քաղաքական ուժը ինչպե՞ս է մասնակցելու ընտրություններին և կոնսոլիդացվելու», արձագանքելով «Ազատության» այն դիտարկմանը, թե «որոշ ընդդիմադիրներ մտավախություն ունեն, որ եթե ԱԺ արտահերթ ընտրությունները շատ ձգձգվեն, Հանրապետականը կամ նախկին իշխանությունները կարող են կոնսոլիդացնել իրենց ուժերը», հայտարարեց Հայաստանի վարչապետ Նիկոլ Փաշինյանը:

Վարչապետը Բրյուսելի օդանավակայանում հինգշաբթի ուշ երեկոյան լրագրողների հետ ճեպազրույցի ընթացքում ամփոփում էր իր առաջին եվրոպական այցելությունը:

«Երբ Ազգային ժողովում տեղի ունեցավ վարչապետի ընտրության առաջին քննարկումը, ես խորհրդարանի ամբիոնից հայտարարեցի, որ այսօր Հանրապետականը ինքնասպանություն գործեց: Եվ ես դեռևս հրապարակից հայտարարել եմ ու հույս ունեմ՝ հիմա անկոռեկտ չի հնչի վարչապետի կարգավիճակում, որ Սերժ Սարգսյանը քաղաքական դիակ է: Զարմանում եմ այդ խոսակցությունների վրա: Ի՞նչ ասեմ, թող կոնսոլիդացվեն»,- ասաց Փաշինյանը:

Անդրադառնալով «Ազատության» մեկ այլ հարցի, թե 2008-ի մարտի 1-ի քրեական գործով վկա, նախկին նախագահ Ռոբերտ Քոչարյանը չի ներկայացել հարցաքննության, և եթե ընդհանրապես չներկայանա, իշխանությունները պատրա՞ստ են միջազգային հետախուզում հայտարարել, Փաշինյանն ասաց․ – «Ես կարծում եմ, որ այդ որոշումները ոչ թե ես եմ կայացնում, դրանք օրենքով կարգավորված որոշումներ են, և մեխանիզմները կան, թե ինչ է տեղի ունենում, եթե որևէ մեկը չի ներկայանում հարցաքննության»: Փաշինյանը կրկին շեշտեց, որ Հայաստանում բոլոր մարդիկ հավասար են օրենքի առաջ:

Հարցին՝ այսինքն չի՞ բացառվում արդյոք, որ «Ինտերպոլի» միջոցով հետախուզում հայտարարվի, վարչապետը արձագանքեց․- «Ես չեմ կարող ասել՝ բացառվում է, կամ չի բացառվում, որովհետև դա նախատեսված է օրենքով: Այսինքն այնպես չի որ ինչ-որ մեկի քմահաճույքով պետք է դա տեղի ունենա: Ես մեր իրավապահ մարմինների հետ աշխատանքում ասել եմ, որ չի լինելու մի դեպք, որ կառավարությունը փորձի ինչ-որ ձևով միջամտել: Չի լինելու այդպիսի բան՝ լինի դա նախկին, թե ներկա իշխանություններից որևէ մեկի նկատմամբ: Սկբունքը սա է»:

Երկրորդ նախագահ Ռոբերտ Քոչարյանը, ով բացակայում է Հայաստանից, մարտի 1-ի գործով հարցաքննության էր հրավիրվել Հատուկ քննչական ծառայություն: Նրա գրասենյակի ղեկավարը «Ազատությանը» հայտնել էր, որ Քոչարյանը պատրաստ է ներկայանալ հարցաքննության, երբ հուլիսի 25-ից հետո արտերկրից վերադառնա Հայաստան:

Ճեպազրույցն ամբողջությամբ կարող եք դիտել ստորև․

azatutyun.am

Be the first to comment

Leave a Reply

Your email address will not be published.


*


Add video comment
Բոլոր իրավունքները պաշտպանված են: Մեջբերումներ անելիս հղումը www.aaeurop.com-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.aaeurop-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Եվրոպայի Հայերի Համագումարի » ի ստորագրությամբ նութերի, կարծիքների եւ դիրքորոշումների համար: All Rights Reserved,4/AAB0Q2qi2hC5WMFScWsapOW0d1ypdvjHSDFgUciTQjW7ImoDTCNLGO4