July 19, 2019

Դիանա Գասպարյան․ Մանվել Գրիգորյանը և նրա ազգականները վախի մթնոլորտ են սփռել քաղաքում

Էջմիածնի քաղաքապետի ժամանակավոր պաշտոնակատար Դիանա Գասպարյան

Էջմիածնի քաղաքապետի պաշտոնակատար Դիանա Գասպարյանն առաջնահերթ է համարում քաղաքում բարոյահոգեբանական մթնոլորտի վերականգնումը:

Վերջերս կալանավորված գեներալ Մանվել Գրիգորյանը և նրա ազգականները, Գասպարյանի խոսքով, վախի մթնոլորտ են սփռել քաղաքում, բայց դա, նրա խոսքով, իր պաշտոնավարման օրոք պետք է վերանա․ – «Վախի մթնոլորտ եղել է, և շատ քիչ մարդ է համարձակություն ունեցել ըմբոստանալ բարքերի դեմ: Եվ այդ մարդիկ էլ առանձնապես հաղթած այդ իրավիճակից դուրս չեն եկել: Հանրապետության մակարդակով իմացվել է: Էջմիածնի վիճակի մասին իրացվել է, որ էջմիածնեցին ապրել է ճնշված, էջմիածնեցին իր քաղաքում վախենում է շատ բան անել»։

Երբ Ազգային անվտանգության ծառայությունը հունիսի 17-ին տեսանյութ հրապարակեց գեներալ Մանվել Գրիգորյանին պատկանող տարածքներում հայտնաբերված ապօրինի զենքի, զինվորներին այդպես էլ չհասած օգնության մասին, նրա որդին՝ Էջմիածնի քաղաքապետ Կարեն Գրիգորյանն առանց որևէ բացատրության ժամեր անց հրաժարական տվեց: Օրերս Հատուկ քննչական ծառայությունը մեղադրանք առաջադրեց Կարեն Գրիգորյանին՝ մի խումբ անձանց կողմից նախնական համաձայնությամբ առանձնապես խոշոր չափերով յուրացման համար: Նա ստորագրությամբ ազատ է արձակվել:

Այս պահին Հայաստանի միակ կին քաղաքապետի պաշտոնակատարն ասաց, որ աուդիտ է անցկացնելու՝ հնարավոր չարաշահումները բացահայտելու համար․ – «Ցանկացած էջմիածնեցու բակում տարիներ շարունակ խոսվել է, որ գնումների գործընթացը քաղաքապետարանում թղթերով միգուցե օրենքի տառին համապատասխան է արվում, սակայն շատ հանգամանքներ կան դրա հետևում: Այսինքն՝ միշտ նույն ընկերություններն են մասնակցել մրցույթներին և հաղթել: Դարձյալ վախի մթնոլորտի հետ կապված՝ որևէ այլ ընկերություններ չեն մտել պայքարի մեջ և միշտ հաղթել են հայտնի մարդկանց հետ կապված ընկերությունները»:

Էջմիածնի բնակիչները թեև դեռ չեն ճանաչում քաղաքապետի պաշտոնակատարին, սակայն հույսեր կապում են 30-ամյա Դիանա Գասպարյանի հետ։

Այսօր Կառավարության նիստից հետո Տարածքային կառավարման նախարար Սուրեն Պապիկյանն ասաց, թե կարծում է, որ Էջմիածնի քաղաքապետի պաշտոնակատարը պատվով կկատարի իր աշխատանքը․ – «Էն փորձը, որ նախկին պաշտոնյաները ունեցել են, մեզ էդ փորձը պետք չի այնքան էլ: Մենք ուզում ենք ավելի շատ իրավունքի երկիր ունենալ, և երիտասարդը, ով պատրաստված է, ունի համապատասխան կրթություն, էս միջավայրում պետք է ինքնադրսևորման հնարավորություն ունենա»:

Հարցին, թե արդյոք Դիանա Գասպարյանը պատրաստ է պայքարել քրեական տարրերի դեմ, Պապիկյանն արձագանքեց․ – «Քրեական տարրերի հետ պայքարը վերապահված է իրավապահ մարմիններին, իսկ իրավապահ մարմինները իրենց գործը պատվով են կատարում: Խնդիր չեմ տեսնում»:

 

azatutyun.am

Be the first to comment

Leave a Reply

Your email address will not be published.


*


Add video comment
Բոլոր իրավունքները պաշտպանված են: Մեջբերումներ անելիս հղումը www.aaeurop.com-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.aaeurop-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Եվրոպայի Հայերի Համագումարի » ի ստորագրությամբ նութերի, կարծիքների եւ դիրքորոշումների համար: All Rights Reserved,4/AAB0Q2qi2hC5WMFScWsapOW0d1ypdvjHSDFgUciTQjW7ImoDTCNLGO4