Rss Feed
Tweeter button
Facebook button
Technorati button
Reddit button
Myspace button
Linkedin button
Webonews button
Delicious button
Digg button
Flickr button
Stumbleupon button
Newsvine button
Youtube button
December 19, 2018

«Մի օր սա պայթելու է. քանի՞ հազար անմեղ երեխա կարա գնա, ու իրենք այսպես ճոռոմ-ճոռոմ խոսեն»

Արամ Մանուկյանը կարծում է, որ Սերժ Սարգսյանի վարչապետ դառնալն էլ ժողովրդին ոտքի չի հանի, թիվ մեկ խնդիրը խաղաղություն պարտադրելն է
«Ելքը» հայտարարում է, որ եթե Սերժ Սարգսյանը, ի հեճուկս իր խոսքերի, վարչապետի պաշտոնը զբաղեցնի, դա կտրուկ կսրի ներքաղաքական իրավիճակը Հայաստանում:
«Առավոտը» ՀԱԿ կուսակցության փոխնախագահ Արամ Մանուկյանին հարցրեց՝ Դուք նման լարվածության աճ սպասո՞ւմ եք, թե՞ չէ, եւ ՀԱԿ-ը որեւէ կերպ ապրիլյան այդ իրադարձություններին պատրաստվո՞ւմ է ինչ-որ մասնակցություն ունենալ՝ Սերժ Սարգսյանի վերարտադրությունը թույլ չտալու հարցում: Նա պատասխանեց. «Ես չեմ կարծում, որ հասարակությունը հիմա այն վիճակում է, որ… դեռ ինքը նախկին ընտրությունների ազդեցության տակ է, այդ ճնշումը, խեղդվածությունը, վիրավորանքը մեջը կա:

Ինքը լավ էլ գիտի, որ խեղճացրել են իրեն, բայց այդ խեղճացումից դուրս գալու ալիք ես դեռեւս չեմ զգում: Եթե այդ ալիքը զգացվեր, ես ուրիշ տեղից էի դա սպասում: Ամենօրյա զոհերը որ կան, հասարակությունը, ինձ թվում է, ավելի շատ պիտի այդտեղից ըմբոստանա: Հիմա ամենաշատ հուզող ու ցավալի թեման այդ մասում է: Բայց այդտեղ էլ դեռ չեմ զգում որեւէ շարժ: Ես կարծում եմ, միգուցե ռեալ չի իմ մտածողությունը, բայց առաջիկա ճնշումը իշխանությունների վրա պետք է լինի էլի Ղարաբաղի հարցով, էլի պատերազմ-խաղաղության թեմայով: Գոնե հասարակության մեջ կամ քաղաքական ուժերի մեջ հասունանում է այն գաղափարը, որ թիվ մեկ պրոբլեմը խաղաղության պրոբլեմն է: Եվ իշխանություններին նաեւ պահող միջոց է խաղաղություն չկնքելը, որովհետեւ ոչ խաղաղություն, ոչ պատերազմ վիճակն իշխանություններն օգտագործում են բնակչությանը ճնշելու համար, եւ գրագետ, սթափ հասարակությունը կաշկանդվում է իշխանափոխություն անել, կտրուկ գործողությունների դիմել, երբ գիտի, որ սահմանում պատերազմի վտանգ կա: Այսինքն՝ այդպիսի ակտիվ գործողությունների գնալու հնարավորություններն այս պահին կաշկանդված են պատերազմի վտանգով, եւ դա նաեւ օգտագործվում է իշխանությունների կողմից: Այդ հնարքը միշտ կիրառել են կիսապատերազմի կամ պատերազմի մեջ գտնվող երկրները, Ալիեւն էլ է այդ հնարքը կիրառում: Ես կարծում եմ, որ առաջիկա ճնշումները իշխանությունների վրա կամ նրանց փոխելու համար կլինի խաղաղության խնդիրը»:
Շատ հեղափոխությունների համար ազդակ են լինում սոցիալական խնդիրները, հասունանում է սոցիալական բունտ, այս թանկացումների ֆոնին հասարակությունը նորից ոտքի չկանգնեց: Արամ Մանուկյանի մեկնաբանությամբ՝ «Ճնշվածությունը, վախը, ապատիկ վիճակը իրեն դեպի սահման են տանում, փախչելով, ոտքերով է արձագանքում այդ վիճակներին: Տխուր վիճակ է, իմ շրջապատում ես մարդ չունեմ, որը չի մտածում գնալու մասին: Այսինքն՝ մարտի դաշտը լքելն այսօր ավելի պրակտիկ է, քան ըմբոստ լինելը: Դրա համար մենք այսօր ունենք ըմբոստ քաղաքացու, ըմբոստ քաղաքական գործչի պակաս: Երբ որ տեսնում է՝ դաշտում կռիվ տվող չկա, ինքը ո՞ւմ հետեւից գնա, թողնում գնում է: Այդ վիճակը դեռ աշխատում է: Ընտրություններին քաղաքացու ողնաշարն իսկապես կոտրեցին, հիմա էլ ընտրություն չկա: Ընտրությունը գոնե քաղաքացուն թույլ էր տալիս փողոց դուրս գալ, գնալ Պողոսի, Պետրոսի հետեւից, ասել՝ սա լավն է, սա քըխ է, սա ծախված է, հիմա դա էլ չկա, դա էլ ոչնչացրին: Սոցիալական բունտն էլ միշտ հեռանկարում ունենում է քաղաքական ուժ, որի հետեւից ինքը կգնա կամ որին կասի՝ ինձ առաջնորդի: Սոցիալական բունտ հանուն նրա, որ գնում են կարագի գինն էժանացնելու, չի կայանա, եթե ինչ-որ մեկի հետ դու այդ խնդիրը չիրականացնես: Ախր թացն ու չորը խառնվել է հիմա, մարդը չգիտի՝ ում հավատա: Կեղծն ավելի շատ է, քան ռեալը: Բայց սա իմ մոտեցումն ու ցանկությունն է, որ առաջիկայում Հայաստանի քաղաքական ուժերը պետք է խաղաղություն պարտադրեն իրենց իշխանություններին: Կա՛մ Սերժ Սարգսյանը պիտի գնա դրան, իսկ եթե գնա, լավ, թող գնա, կա՛մ թող հեռանա, ուրիշները գնան այս ծրագիրն իրականացնեն: Ժամանակը, փաստերը, տվյալները, դինամիկան ասում են, որ այդ խնդիրն անհետաձգելի է, լուծելու անհրաժեշտություն ունեցող խնդիր է»:

Մեր դիտարկմանը՝ ընտրությունները ցույց տվեցին, որ ժողովուրդը շատ ցավոտ է ընդունում Ձեր ասած տարբերակը, Արամ Մանուկյանն արձագանքեց. «Որովհետեւ այդպես իրեն դաստիարակել են, այդպես իրեն մատուցել են: Երբ որ առանձին խոսում ես, լավ էլ բոլորը հասկանում են: Հայաստանի ամբողջ բնակչությունը յուրաքանչյուր երեխու զոհվելով ցավում է, յուրաքանչյուրս առավոտ նայում ենք նորությունները, եւ ամեն մեկս մեր մեջ լռակյաց կամ բաց, կիսվելով տառապանք ենք ապրում, յուրաքանչյուրը ցավ է ապրում, որ անմեղ մի երեխա գնաց: Մի օր սա պայթելու է. քանի՞ հազար անմեղ երեխա կարա գնա, ու իրենք այսպես ճոռոմ-ճոռոմ խոսեն ու դրա դեմը չառնե՞ն: Ես կարծում եմ՝ սա է թիվ մեկ թեման, որի համար հասարակությունը կարող է համախմբվել ու սրանց հախից գալ»:
Դիտարկմանը, որ տարածքների հանձնման ոչ ոք չի գնա, Սերժ Սարգսյանն էլ հստակ հայտարարեց, Արամ Մանուկյանը պատասխանեց. «Արի այսպես ասենք՝ փոխզիջումային տարբերակի մասին ենք խոսում, որը եղել է տարածքները ազատագրելու առաջին օրվանից:
Այսինքն՝ 28 տարի այդ ծրագիրն ուժի մեջ է եղել՝ ոչ թե տարածք հանձնելու, այլ լրացուցիչ տարածք վերցնելու, որը կարող է բանակցային նյութ հանդիսանալ՝ կարգավիճակի հարցը լուծելու համար: Շատ պարզ, շատ հասարակ, շատ ռեալ, շատ պրակտիկ, շատ ավանդույթային միջոց է: Ես քեզ ուզում եմ խեղճացնեմ, շատ ուժեղ ցավացնում եմ, ցավը շատանում է, ասում ես՝ քչացրու, քչացնում եմ, բայց դու իմ պայմանը կատարում ես: Այսինքն՝ շատ վերցնում են, քիչը ապահովագրում են փաստաթղթով, սա՛ է պատմական մեր առաքելությունը: Եվ կստացվի 2-3 հազար տարվա մեջ Հայաստանը փաստաթղթով տարածք է ազատագրել, Հայաստանն ազատագրել է, սրանից այն կողմ ի՞նչ ենք ուզում»:
ՀՌԻՓՍԻՄԵ ՋԵԲԵՋՅԱՆ
«Առավոտ»
15.02.2018

Be the first to comment

Leave a Reply

Your email address will not be published.


*


Add video comment
Բոլոր իրավունքները պաշտպանված են: Մեջբերումներ անելիս հղումը www.aaeurop.com-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.aaeurop-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Եվրոպայի Հայերի Համագումարի » ի ստորագրությամբ նութերի, կարծիքների եւ դիրքորոշումների համար: All Rights Reserved,4/AAB0Q2qi2hC5WMFScWsapOW0d1ypdvjHSDFgUciTQjW7ImoDTCNLGO4