September 22, 2021

Վախճանվել է ՀՀ ժողովրդական արտիստ Արաքս Դավթյանը

Երեկ Մոսկվայում վախճանվել է անվանի երգչուհի, ՀՀ ժողովրդական արտիստ Արաքս Դավթյանը: Ա. Դավթյանը ծնվել է 1949 թվականի ապրիլի 22-ին զինվորական օդաչուի ընտանիքում: 1975թ. ավարտել է Երևանի պետական կոնսերվատորիան: Որպես մեներգչուհի 1975-86 թթ. աշխատել է կոնսերվատորիայի օպերային ստուդիայում, 1986-92-ին` ՀՀ հեռուստառադիոպետկոմի սիմֆոնիկ նվագախմբում:

Նա առաջին խորհրդային երգչուհին էր, ով հաղթանակ տարավ երաժշտարվեստի այնպիսի հեղինակավոր ստուգատեսում, ինչպիսին է Իտալիայի Վերչելլի քաղաքում անցկացվող «Վիոտիի անվան մրցույթը» (1986թ.), որից անմիջապես հետո «Տրավիատայում» Վիոելետայի դերերգով հանդես գալու հրավեր ստացավ Մեծ թատրոնից:

Արաքս Դավթյանի լիրիկական սոպրանոն հնչել է աշխարհի հարյուր քսանից ավելի հեղինակավոր համերգային դահլիճներում. «Կարնեգի Հոլլ»(Նյու Յորք), «Գավո» (Փարիզ), «Գեբաու» (Ամստերդամ), «Սենթըր Հոլլ» (Տոկիո) և այլն: Համագործակցել է հանրահայտ արտիստներ` Ռիկարդո Շաիի, Գենադի Ռոժդեստվենսկու, Պիտեր Կլաուս Ֆլորի, Ելենա Օբրազցովայի, Թամարա Սինյավսկայայի և այլոց հետ: Հատկապես հիշարժան է Ջուզեպպե Վերդիի «Ռեքվիեմի» (դասական երկացանկում համարվում է տեխնիկապես ամենաբարդ կատարելի ստեղծագործություններից մեկը) փայլուն կատարումը Ամստերդամի «Գեբաու» դահլիճում` 1988թ.:

Երգչուհին նաև մանկավարժ էր: Նա վոկալ է դասավանդել Կոմիտասի անվան պետական կոնսերվատորիայում (1997-ից` կոնսերվատորիայի պրոֆեսոր), նաև Մոսկվայում, ուր աշխատեց մինչև կյանքի վերջը: Արաքս Դավթյանը զբաղվում էր ակտիվ համերգային գործունեությամբ, ուներ լայն երկացանկ, որի մեջ մշտական տեղ ունեին հայ, ռուս և արևմտաեվրոպական կոմպոզիտորների ընտիր ստեղծագործությունները: Վլադիմիր Սպիվակովի գնահատմամբ` Ա.Դավթյանը Մոցարտի ստեղծագործությունների մեծագույն մեկնաբանն էր:

Արաքս Դավթյանը նաև բացառիկ արտիստիզմի տեր անձնավորություն էր, ինչի վկայությունն է ճանաչված ռեժիսոր Ռուստամ Խամդամովի «Վոկալ զուգահեռներ» խաղարկային ֆիլմում նրա մարմնավորած փայլուն կերպարը:

Ինչպես տեղեկացնում են ՀՀ մշակույթի նախարարությունից, Արաքս Դավթյանի դին Հայաստան տեղափոխելու և հուղարկավորելու նպատակով ՀՀ վարչապետի որոշմամբ ստեղծվել է պետական հանձնաժողով: Վերջին հրաժեշտի վայրի և ժամկետի մասին հանրությանը կծանուցվի լրացուցիչ:

hetq.am

Be the first to comment

Leave a Reply

Your email address will not be published.


*


4/AAB0Q2qi2hC5WMFScWsapOW0d1ypdvjHSDFgUciTQjW7ImoDTCNLGO4