Հայաստան-Սփիւռք 6-րդ համագումար. Փոխադարձ վստահութեան տագնապ

«Փոխադարձ վստահութիւն, միասնականութիւն եւ պատասխանատւութիւն» խորագրով Հայաստան-Սփիւռք 6-րդ համագումարը պիտի կայանայ Սեպտեմբեր 18-էն 20, միաժամանակ պիտի յայտարարուի Համազգային խորհուրդի կազմութիւնը։

Համաժողովին խորագիրը արդէն կ՚արտայայտէ մեծ տագնապ մը, որ անկախութենէն ի վեր դամոկլեան սուրի նման կախուած է Հայութեան գլխուն՝ իշխանութեան հանդէպ վստահութիւնը։ Ինչպէ՞ս Սփիւռքը հաստատէ փոխադարձ վստահելի կապեր իշխանութեան հետ, որ չի վայելեր իր իսկ ժողովուրդին վստահութիւնը։
Սփիւռքահայութիւնը անմասն չէ Հայաստանի ժողովուրդէն, կան ներթափանցումներ՝ երկիրը լքած Հայաստանցիները մաս կը կազմեն Սփիւռքահայութեան եւ փոխադարձաբար՝ Հայաստան հաստատուած Սփիւռքահայեր։
Անկախութեան 26 տարիներու ընթացքին տեղի ունեցած Հայաստան-Սփիւռք 5 համաժողովները յատկանշական արդիւնքներ չեն տուած։ Յիշատակելի են՝ երկ-
քաղաքացիութեան հաստատումը, Սփիւռքի նախարարութեան ստեղծումը եւ Սփիւռքահայութեան՝ Ցեղասպանութեան ճանաչման արշաւներուն Հայաստանի արտաքին քաղաքականութեան ընձեռած նեցուկը։
Ամենէն կարեւոր կառոյցը՝ «Հայաստան» համահայկական հիմնադրամը ստեղծուած է 1992-ին՝ նախքան Հայաստան-Սփիւռք համաժողովները. ան անկախութեան սկզբնական շրջանին հանդիսացաւ կարեւոր հաստատութիւն մը նիւթապէս օժանդակելու հայրենիքին, որ կը դիմագրաւէր բազմաթիւ հարցեր՝ սովետական վարչակարգի փլուզումէն յառաջացած տնտեսական եւ ընկերային խնդիրները, երկրաշարժը եւ Ազէրպայճանի հետ պատերազմը։ Անկէ ետք այդ նոյն հոգեբանութեամբ զարգացած են Սփիւռք-Հայաստան յարաբերութիւնները՝ Սփիւռքէն նիւթական օժանդակութիւն՝ ազգասիրական զգացումները բաւարարելու դիմաց, կա՛մ ալ տնտեսական ներդրումներու խրախուսում օլիկարխներու սեփականացուցած տնտեսական բնագաւառներէն դուրս։
Հայաստանի տնտեսական եւ քաղաքական զարգացումը անկախութեան 26 տարիներու ընթացքին ապահոված են ծրագրային նպաստները եւ վարկերը օտար պետութիւններու, որոնք պայմանաւորած են օժանդակութիւնը օրէնսդրական եւ քաղաքական դաշտի բարեկարգումներով։
Դժբախտաբար, Սփիւռքը դեր չէ ունեցած Հայաստանի պետական համակարգի զարգացման մէջ։ Ընդհակառակն, ան հարկադրաբար նեցուկ կանգնած է իշխող համակարգին, որ անմտօրէն եւ ագահօրէն յափշտակած է երկրին հարստութիւնը եւ թշուառացուցած՝ ժողովուրդը, ի վնաս Հայաստանի անկախութեան եւ հզօրացման։ 
Համահայկական խորհուրդը պիտի ըլլայ 6-րդ համագումարին խորհրդանշական ձեռքբերումը, որ սակայն, մինչ այժմ, բացի շահագրգիռ կողմերէն, գոնէ Սփիւռքի մէջ ոչ մէկ խանդավառութիւն ստեղծած է։ Ֆրանսահայութիւնը ունի փորձը Ֆրանսայի սահմաններէն ներս համահայկական կառոյցի մը՝ Ֆրանսահայ ընկերակցութիւնները համակարգող խորհուրդի (CCAF) ստեղծման, որ կը տառապի ներկայացուցչականութեան պակասէ, տնտեսական յենակի բացակայութենէ։
Ան փորձեց բարեկարգել ինքզինք ժողովրդավարական կառոյց մը ստեղծելու նպատակով, չյաջողեցաւ։
Դեռ յայտնի չէ, թէ ի՞նչ դերակատարութիւն պիտի ունենայ ապագայ Համահայկական խորհուրդը, որո՞նք պիտի ըլլան նպատակները, ինչպիսի՞ ներկայացուցչական կազմով։ Դատելով մինչեւ այժմ կեանքի կոչուած Հայաստան-Սփիւռք կառոյցներու կազմութենէն եւ գործելաոճէն, եւ Հայաստանի մէջ տիրող ժողովրդավարական կարգերու պակասէն, Համահայկական խորհուրդն ալ պիտի ունենայ ձեւական իմաստ, գոնէ սկզբնական շրջանին, մինչեւ որ մտայնութիւնները, հոգեբանութիւնները յեղաշրջուին։
Ժ.Չ.

«Նոր Յառաջ»

Սեպտեմբեր 7

Be the first to comment

Leave a Reply

Your email address will not be published.


*


Add video comment
Բոլոր իրավունքները պաշտպանված են: Մեջբերումներ անելիս հղումը www.aaeurop.com-ին պարտադիր է: Կայքի հոդվածների մասնակի կամ ամբողջական արտատպումը, տարածումը, կամ հեռուստառադիոընթերցումն առանց www.aaeurop-ին հղման արգելվում է:Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Կայքը պատասխանատվություն է կրում միայն «Եվրոպայի Հայերի Համագումարի » ի ստորագրությամբ նութերի, կարծիքների եւ դիրքորոշումների համար: All Rights Reserved,