ԵՐԵՎԱՆ, 25 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի Սփյուռքի նախարարության Հարավային (Լատինական) Ամերիկայի հայ համայնքների կրթամշակութային հիմնախնդիրների լուծմանն աջակցության ծրագրի շրջանակներում մայիսի 10-21-ին ՀՀ վաստակավոր արտիստներ Արսեն Գրիգորյանը (Մրո), Արամ Գեւորգյանը (Արամո) եւ ճանաչված երգչուհի Էմմա Պետրոսյանը այցելել էին Արգենտինա, Ուրուգվայ եւ Բրազիլիա: Նշված ժամանակահատվածում նրանք էստրադային, ժողովրդական, գուսանական եւ ազգային երգերի կատարումներով հանդես են եկել Բուենոս Այրես, Կորդոբա, Մոնտեվիդեո, Սան Պաուլո քաղաքներում եւ ամենուրեք արժանացել հանդիսատեսի ջերմ ընդունելությանը:
Ըստ ՀՀ Սփյուռքի նախարարության Մամուլի եւ հասարակայնության հետ կապերի վարչության հաղորդագրության, մայիսի 25-ին երգիչներին ընդունել է նախարար Հրանուշ Հակոբյանը եւ շնորհավորել նրանց Արգենտինայում, Ուրուգվայում եւ Բրազիլիայում աննախադեպ համերգային ծրագրով հանդես գալու կապակցությամբ: Նախարարը նշել է, որ Լատինական Ամերիկայի երկրներում ուծացման գործընթացը արագ է ընթանում, իսկ Հայաստանի անկախացումից հետո նշված համայնքները դուրս են մնացել ուշադրությունից եւ այնտեղ նման միջոցառումներ երբեւէ չէին կազմակերպվել: Երգիչները, Հ.Հակոբյանի խոսքերով, ՀՀ Սփյուռքի նախարարության բանագնացներ էին: Նախարարը կարեւորել է այն հանգամանքը, որ նրանք հանդես են եկել բարեգործական համերգներով, ինչը մեկ անգամ եւս ապացուցեց նրանց պետական մտածողության մասին:
Շնորհակալություն հայտնելով նախարարին ծրագրին մասնակցելու հնարավորություն ընձեռելու համար, երգիչները ներկայացրել են համերգային շրջագայության ընթացքում ստացած տպավորությունները, պատմել հայ համայնքի ոգեւորության եւ ջերմ ընդունելության մասին: Նրանք կարեւորել են նման նախաձեռնությունների ռազմավարական նշանակությունը` հայապահպանության, հայ համայնքի համախմբման եւ այլ առումներով: «Հանգիստ առուն սկսեց քրքջալ»,- ասել է Արամոն` փորձելով նկարագրել այն մեծ ոգեւորությունը, որն առաջացել էր հայության շրջանում:
Երգիչները Հ.Հակոբյանին տեղեկացրեցին նաեւ ՀՀ Սփյուռքի նախարարության ստեղծման կապակցությամբ Սփյուռքի հայ համայնքներում տիրող մեծ ոգեւորության մասին:
photo by diplomat.am
Leave a Reply